Сывлăхран хакли нимĕн те çук теççĕ ваттисем. Çак сăмахсемпе пурте килĕшеççĕ пулĕ, мĕншĕн тесен сывлăхлă çын пур енлĕн аталанма, вăй хурса ĕçлеме,  тăрăшса вĕренме - тулли пурнăçпа пурăнма пултарать.   Шел пулин те, вĕренекенсем хушшинче çирĕп сывлăхлă ачасем питĕ сахал. Çакă чи малтанах  телевизорпа компьютер умĕнче нумай ларнипе,  ачасем  сывлăхне сиенлĕ йăла-йĕркесемпе наркăмăшланипе, сахал хускалнипе çыхăннă. Çавăнпа та шкулăн тĕп тĕллевĕсенчен пĕри - ачасен сывлăхне çирĕплетесси, упрама вĕрентесси.

«Çамрăксем сывă пурнăç йĕркишĕн» уйăхлăха  хутшăнса Палтайри ял библиотекинче «Сывлăх - чи хаклă пуянлăх» кĕнеке куравĕ йĕркеленĕ. Куравра ачасен сывлăхĕ çирĕп пултăр тесен вĕсен организмне аталанма мĕнле витаминсем кирли çинчен кĕнеке-журналсем, статьясем курма пулать. Кĕлеткене пиçĕхтерес тесен мĕнле кун йĕркине пăхăнмалли çинчен,  мĕнле хусканусем тумалли çинчен те кирлĕ материал тупса вулама пулать.

Çак курав Чăваш Ен, Раççей çĕр-шывĕн паллă спортсменĕсем çинчен каласа паракан кĕнекесемпе те паллаштарать. Çак курав шкул ачисемшĕн усăллă пуласса шанса, пирěн пата хăнана Палтайри пěтěмěшле пěлӳ паракан шкулти 6-мěш классем килсе ҫитрěҫ. Вěсемпе пěрле эпир сывлăха упрас йěркене пăхса тухрăмăр, сывлăхпа-спротпа ҫыхăннă ваттисен сăмахěсемпе паллашрăмăр.